armenpress.am. «Հուսո առագաստ-2019»-ն սպասում է մասնակիցներին
Հուլիսին կայանալիք «Հուսո առագաստ-2019» հեղինակային երգի 5-րդ միջազգային փառատոնն սպասում է մասնակիցներին
12.06.2019
ԵՐԵՎԱՆ, 12 ՀՈՒՆԻՍԻ, ԱՐՄԵՆՊՐԵՍ: «Սիվիլ արտ» մշակութային հասարակական կազմակերպությունը «Բարդերի ակումբ» ստեղծագործական միավորման հետ 5-րդ տարին հայտարարում է «Հուսո առագաստ» հեղինակային երգի միջազգային փառատոնի անցկացման մասին:
Ինչպես «Արմենպրես»-ին տեղեկացրին «Սիվիլ արտ»-ից և «Բարդերի ակումբ»-ից, փառատոնն կընթանա նախընտրական և համերգային փուլերով։ Առաջինը ներառելու է հայտերի ընդունումը և նախնական լսումները (մինչև հուլիսի 7-ը), որի ընթացքում փառատոնի ժյուրիի կազմը կլսի նախապես հայտադիմումներ լրացրած մասնակիցներին։ Արդյունքում կորոշվեն «Լավագույն տասնյակ-2019» անվանակարգին արժանի մասնակիցները, որոնք իրենց ելույթներով կներկայանան հաջորդ՝ համերգային փուլին։ «Փառատոնի շրջանակում մասնակիցների կեցության հարցերը հոգում են փառատոնի կազմակերպիչները։
«Համերգային փուլը տեղի է ունենալու հուլիսի 19-21-ը Գեղարքունիքի մարզում՝ Շորժա գյուղին հարակից «WishUp» լողափում։ Կազմակերպվելու է հեղինակային երգի եռօրյա համերգաշար, որն ամփոփվելու է հավաստագրերի, շնորհակալագրերի և խորհրդանշական նվերների հանձնման հանդիսավոր արարողությամբ և հեղինակ-կատարողների մի քանի սերունդների մասնակցությամբ գալա մեծ համերգով։
Փառատոնի եռօրյա համերգաշարերին հանդես են գալու անվանի հայ հեղինակ-կատարողներ, հեղինակային երգի (բարդ) ժանրում նորահայտ ստեղծագործողներ (հեղինակ-կատարողների նոր սերունդ), փառատոնի «Լավագույն տասնյակ» անվանակարգին արժանացած հեղինակ-կատարողներ, Հայաստան ժամանած արտերկրյա հյուրեր՝ հեղինակ-կատարողներ։ Փառատոնի մասին մանրամասն կարող եք տեղեկանալ BARDFEST Armenia ֆեսբուքյան էջից կամ զանգահարել 091497387 հեռախոսահամարին։
Փառատոնը կազմակերպվում է 2015 թվականից։ Հիմնական նպատակը սկսնակ հեղինակ-կատարողներին հայտնաբերելն ու նրանց ստեղծագործական գործունությունը խթանելն է, բեմ տրամադրելը, ինչպես նաև մշակութային միջավայր ստեղծելը և հեղինակային երգի (բարդ) ժանրի սիրահարների ու երգահանների միջև շփում ապահովելը»,- նշված է հաղորդագրության մեջ։