Կենսագրություն. Էդուարդ Զորիկյան

Էդուարդ Զորիկյանը (ծնվ. 1961 թ. հունիսի 2-ին, Երևան) հայ բանաստեղծ, երգահան, սցենարիստ և բեմադրիչ է, հեղինակային երգի շարժման ճանաչված դեմքերից մեկը։

«Աշխարհում երկրներ կան՝ չքնա՜ղ ու սիրո՜ւն, Բայց մենք մեր անուշ Հայաստա՛նն ենք սիրում:»

Կրթություն

Սովորել է Երևանի Մռավյանի անվան դպրոցում (1968–1969), ապա Պուշկինի անվան թիվ 8 ռուսական միջնակարգ դպրոցում (1970–1978)։ 1979–1984 թթ. ուսանել է Երևանի պետական համալսարանի երկրաբանության ֆակուլտետի երկրաֆիզիկայի բաժնում։ 1984–1989 թթ. աշխատել է Երևանի Կանաքերի երկրաբանական-երկրաֆիզիկական արշավախմբում, այնուհետև անցել է մաքուր ստեղծագործական աշխատանքի թատրոնում, հեռուստատեսությունում և ռադիոյում։

Ստեղծագործական ուղին

Հեղինակ է ավելի քան 300 երգի և բանաստեղծության։ Գրել է առաջին հայկական ռոք-օպերայի լիբրետոն և երաժշտությունը (պրեմիերան՝ 1991 թ., 1996 թ. բեմադրվել է Համազգային թատրոնում՝ Սոս Սարգսյանի ղեկավարությամբ, ռեժիսոր՝ Հրաչյա Գասպարյան)։ Բարդերի ակումբի «Հուսո առագաստ» երգի համահեղինակն է։ երաժշտություն է գրել «Դիպլիպիտո», «Ֆրանսուա Վիյոն», «Այրվող մոմեր», «Աներևույթ թագավորությունը», «Հրեշը լուսնի վրա», «Անմահների Երկիրը» (վերջինիս պիեսի հեղինակն էլ ինքն է) ներկայացումների համար, ինչպես նաև «Սանտա Կրուս» մյուզիքլի լիբրետոն ու երաժշտությունը։ Միմ արտիստ Հայկ Զորիկյանի հետ բեմադրել է «Համլետ» և «Պահպանեք միմյանց, մարդիկ» մենաներկայացումները։ Թարգմանել է Վան Չ Լիի («Թիթեռնիկը», «Լաբիրինթոս») և Գաբրիել Սամիի գրքերը։ 2019 թ. դեկտեմբերին Ասողիկ հրատարակչությունը լույս է ընծայել նրա «Ազատության անունն է սեր» բանաստեղծությունների ժողովածուն։ Թողարկել է 3 լազերային սկավառակ և 4 աուդիոկասետ։ Համագործակցել է Երևանի մի շարք թատրոնների (Եռանկյունի, Հենրիկ Մալյանի, Մհեր Մկրտչյանի, Մետրո, Համազգային) և Ստեփանակերտի դրամատիկական թատրոնի հետ, գրել է պետական միջոցառումների սցենարներ։

Կապը հեղինակային երգի շարժման հետ. «Ոսկե Լար» հանրապետական հեղինակային երգի փառատոնի Գրան պրիի դափնեկիր (1996), «Ընթացք» հանրապետական փառատոնի ժյուրիի անդամ, «Ոսկե Կիթառ» հանրապետական փառատոնի գեղարվեստական ղեկավար, «Հուսո Առագաստ» միջազգային հեղինակային երգի փառատոնի ժյուրիի նախագահ։ Նրա վեց երգ («Աշխարհն ու մենք», «Գիշերը մուտ, գիշերը ջինջ», «Գոմաբի բզեզը», «Դստրիկիս նկարը», «Հոգեօրորը», «Մըր էրգիր մեր սերն է») ընդգրկված են Բարդերի ակումբի «Հեղինակային երգի հավաքածու 3» ժողովածուում՝ խոսքերի ու ակորդների PDF-ով։ Բարդերի ակումբի կայքում առկա են նրա տեսադարանը, 30.07.2016 թ. համատեղ համերգը Արեգ Նազարյանի հետ The LOFT-ում, ինչպես նաև մամուլում հրապարակված զրույցները (Sputnik Armenia, bac tv, Հ1 «Առավոտը Հանրայինում», 2016)։

Պարգևներ

ՀՀ մշակույթի նախարարության ոսկե մեդալ, Երևանի քաղաքապետարանի մրցանակներ՝ Երևանին նվիրված լավագույն երգի և հեղինակային երգի բնագավառում ներդրման համար։

2026 թ. հոկտեմբերին մասնակցել է Բարդերի ակումբի կազմակերպած՝ «Ֆասթ Բանկ»-ի աջակցությամբ բարեգործական համերգին Հովհաննես Թումանյանի անվան պետական տիկնիկային թատրոնում՝ Վախթանգ Հարությունյանի, Արմինե Հայրապետյանի և Ռուբեն Հախվերդյանի հետ միասին։

Ամուսնացած է, ունի երկու երեխա՝ Հայկ Զորիկյան (ծնվ. 1983) և Սիրարպի Զորիկյան (ծնվ. 1994)։