Լիլիթ Սարգսյան (ծնվ. 1975 թ. դեկտեմբերի 25-ին, Երևան) հայ հեղինակ-կատարող է, թարգմանիչ, զբոսաշրջիկ և զբոսավար, երգասաց և խմբավար։ Երաժշտական կրթությունը սկսվել է տանից՝ հայ և եվրոպական դասականների, Էլլա Ֆիցջերալդի, Սթիվի Ուանդերի ու Ազնավուրի, ինչպես նաև ժողովրդական ու բարդյան երգերի միջավայրից. 1970-ականների վերջից տանը հնչել է Բուլատ Օկուջավան՝ Ռաֆայել Պապայանի հայերեն թարգմանությամբ և կատարմամբ։ Նրա «երկրորդ երգերի դպրոցը» եղել է մորաքույրը՝ երգչուհի Ժաննա Թալյանը, որը կիթառով կատարելով տարբեր հեղինակային երգեր՝ տասնամյա Լիլիթին որպես երկրորդ ձայն իր հետ է տարել ելույթների ու համերգների. նրա համոզմամբ է գրվել Լիլիթի հեղինակային երգերի մեծ մասը, առաջին երգը՝ ութ տարեկանում։
«Արահետ է, կածան, թե շավիղ, ճանապարհ, Միայն թե տանի դեպի Հույս, դեպի Լույս։»
1982–1992 թթ. սովորել է Երևանի թիվ 114 միջնակարգ դպրոցում, 1987–1992 թթ.՝ Սայաթ-Նովայի անվան երաժշտական դպրոցում (դասական կիթառ, Էդուարդ Բադալյանի դասարան, ավարտել է գերազանցությամբ), 1993 թ. մասնավոր դասեր է վերցրել Լոնդոնում՝ կիթառահար Գիլբերտ Բիբերիանից։ 1990–1992 թթ. եղել է Երևանի առաջին կիրակնօրյա դպրոցի առաջին շրջանավարտներից և այնտեղ դասավանդել 1992–2003 թթ., իսկ 1992–1997 թթ. սովորել է Երևանի օտար լեզուների ինստիտուտում (անգլերենի բաժնի առաջին շրջանավարտներից)։
Հայ Առաքելական Սուրբ Եկեղեցին համարում է իր գլխավոր երաժշտական դպրոցը. եկեղեցական երգեցողությամբ է զբաղվել Լոնդոնում (1993–1994), ապա՝ Էջմիածնում, Երևանում, Չարենցավանում և Ձրվեզում. 1997 թ.ից ղեկավարում է Ձրվեզի Սուրբ Կաթողիկե եկեղեցու «Սաղմոս» երգչախումբը (հոգևոր հովիվը՝ տեր Կյուրեղ Թալյանը)։ Սիրողական երգչախումբը բազմաթիվ համերգներ է ունեցել, արժանացել առաջին մրցանակների միջազգային փառատոներում Լեհաստանում (2002) և Բելառուսում (2009), հանդես եկել Գերմանիայում (2005)։
Որպես հեղինակ-կատարող առաջին անգամ միջազգային փառատոնի է մասնակցել 1989 թ.՝ Մոսկվայում։ Ձայնագրությունները ներառում են «Ժաննա և Լիլիթ» կասետը (1987), բարդյան երգերի կասետը (1989), «Առաւօտ լուսոյ» հոգևոր երգերի (2001), «ընդ'Անի'Ք» բարդյան երգերի (2003), ժողովրդական երգերի (2008) ձայնասկավառակները, Հանովերի համերգի DVD-ն (2005) և «Բուլատ Օկուջավա. հայերեն կատարումներ» ձայնասկավառակը (2009)։ Օկուջավայի երգերը հայերեն կատարելու համար մամուլում անվանել են «Օկուջավայի դեսպանը Հայաստանում». ձայնասկավառակի շնորհանդեսից հետո Երևանում կազմակերպել է Օկուջավային նվիրված շաբաթօրյա հեղինակային երգի երեկոներ, որոնք տևել են հինգ տարի, իսկ 2014 թ.՝ բարդի 90-ամյակի տարում, ներկայացրել է Հայաստանը միջազգային փառատոներում Ռուսաստանում և Լեհաստանում (որտեղ երգել է հայերեն թարգմանություններով)։ 2009 թ. հիմնադրել է «ԱՐԱՀԵՏ ԹՐԱՎԼ» զբոսաշրջային ընկերությունը, որը նպաստում է հայկական հոգևոր, ժողովրդական և բարդյան երգի արվեստին։
Բարդերի ակումբի «Հեղինակային երգի հավաքածու 3» ժողովածուում (bardclub.am, 2016) ներկայացված են նրա յոթ երգերը՝ «Առագաստ», «Թող քնեմ», «Նավս», «Ռոմանս», «Տո՜ւր, Տե՛ր Աստված», «Րոպե-րոպե», «Ո՞ւր ես, հո՛ւյս իմ»։
