Հայտարարվել է Հուսո առագաստ 2026 փառատոնի ընտրական փուլի մեկնարկը

Հարգելի հետևորդներ, Ուրախ ենք հայտնել, որ մեկնարկել է «Հուսո առագաստ-2026» հեղինակային երգի միջազգային փառատոնի նախընտրական փուլը։ Մրցույթին կարող եք մասնակցել ինչպես ձեր հեղինակած երգերի կատարումներով, այնպես էլ որևէ այլ հեղինակի ստեղծագործության սեփական մեկնաբանությամբ։ Նախնական ընտրությունն անցած հայտատուները կմասնակցեն ընտրական փուլի եզրափակիչ համերգային ծրագրին, որը կկայանա հունիսի 20-ին, Ազգային տիկնիկային թատրոնում։ Համերգի ընթացքում ժյուրիի անդամները կընտրեն լավագույններին, որոնք և հնարավորություն կստանան մասնակցելու 2026թ․ հուլիսի 17-ից 19-ը Սևանի ափի «Wish Up» հանգստյան գոտում կայանալիք եռօրյա փառատոնին։ Մասնակիցների կացությունը և սնունդը կապահովվեն փառատոնի կողմից։ Հայտերի ընդունման վերջնաժամկետն է հունիսի 10-ը։

Լրացուցիչ տեղեկությունների համար կարող եք․

- գրել BardFestArmenia ֆեյսբուքյան էջին կամ bardfestival.armenia@gmail.com էլ․ հասցեին, կամ

- զանգահարել 099942022 հեռախոսահամարով։

«ՀՈՒՍՈ ԱՌԱԳԱՍՏ-2026» ՓԱՌԱՏՈՆԻ ՆԱԽԸՆՏՐԱԿԱՆ ՓՈՒԼԻ ԿԱՆՈՆՆԵՐԸ

Մրցույթը անց է կացվում 2️ անվանակարգով՝

• ԼԱՎԱԳՈՒՅՆ ՀԵՂԻՆԱԿ-ԿԱՏԱՐՈՂ․ Այս անվանակարգում կարող եք մասնակցել, եթե կատարում եք ձեր հեղինակած երգերը, կամ էլ հանդիսանում եք երգի բառերի կամ երաժշտության հեղինակը։ Երգը պետք է գրված լինի հայերեն լեզվով և կատարվի կիթառի սեփական նվագակցությամբ։
• ԼԱՎԱԳՈՒՅՆ ԿԱՏԱՐՈՂ․ Այս անվանակարգում կարող եք մասնակցել՝ կատարելով այլ հայ հեղինակների ստեղծագործություններ (կամ այլ հայ հեղինակների երաժշտությամբ կամ բառերով գրված ստեղծագործություններ)՝ հայերեն լեզվով, կիթառի սեփական նվագակցությամբ։
Ընտրական փուլին մասնակցելու համար պետք է․
- լրացնել մրցույթին մասնակցելու հայտադիմումը հետևյալ հղումով՝ https://forms.gle/oLoTEaKvdTiJ8UBc7 - ուղարկել նամակ bardfestival.armenia@gmail.com հասցեին՝ կցելով․
*մրցութային երգի հոլովակը (տեսաձայնագրություն կենդանի կատարմամբ, կիթառի սեփական նվագակցությամբ, առանց գործիքավորման) կամ հոլովակի հղումը,
* մրցութային երգի վերնագրված տեքստը, եթե հեղինակը դուք եք։