Կենսագրություն. Ռուբեն Քամալյան

Ռուբեն Սամվելի Քամալյանը պոետ, երգահան և հոգեբան-մանկավարժ է։ Ծնվել է 1981 թ. մարտի 28-ին Երևանում։

«Ես զորեղ եմ, մարդի՛կ. Խղճից դեռ չեմ շեղվել, Իսկ ազատվել խղճից Ես անզոր եմ եղել...»

1987–1997 թթ. սովորել է Գարեգին Նժդեհի անվան միջնակարգ դպրոցում (անգլերենի խորացված ուսուցմամբ), իսկ 1997–2002 թթ.՝ Խաչատուր Աբովյանի անվան հայկական պետական մանկավարժական ինստիտուտում (այժմ՝ մանկավարժական համալսարան)՝ ստանալով մանկավարժ-հոգեբանի որակավորում։ 2002–2004 թթ. ծառայել է ԼՂՀ զինված ուժերում՝ որպես դասակի հրամանատարի տեղակալ, Ստեփանակերտի սպայի տանը կազմակերպել է բազմաթիվ միջոցառումներ։

Երաժշտական գործունեություն՝ մասնակցել է «Երևանը երգերիս մեջ» միջոցառմանը (2004), «Ոսկե կիթառ» փառատոնին (2006 և 2008)։ 2011 թվականից Բարդերի ակումբի անդամ է։ Հեղինակ է մոտ 30 հեղինակային երգի և 300-ից ավելի բանաստեղծության։ 2012 թ. թողարկել է առաջին՝ «Սա է կյանքը քո» ալբոմը։ Ամուսնացած է, ունի մեկ երեխա։

«Հեղինակային երգի հավաքածու 3»-ում ընդգրկված են նրա «Կռիվ», «Հավերժ», «Հարազատներ», «Հարբեցողը» և «Սփոփանք» երգերը։ Բարդերի ակումբի կայքում առկա է նաև նրա 2015 թ. դեկտեմբերի 7-ի մենահամերգի տեսաշարը։