Կենսագրություն. Արմեն Ադամյան

Արմեն Արամի Ադամյանը հայ երգահան, բանաստեղծ, կիթառահար և հեղինակ-կատարող է, Բարդերի ակումբի անդամ։ Ծնվել է 1952 թ. հոկտեմբերի 22-ին Եղեգնաձորի շրջանի Արենի գյուղում (անձնագրում՝ 23 փետրվարի, 1953), մանկավարժների ընտանիքում։ 1970 թ. ավարտել է Եղեգնաձորի № 1 միջնակարգ դպրոցը, 1970–1974 թթ. սովորել Երևանի Բրյուսովի անվան ռուսաց և օտար լեզուների ինստիտուտի գերմաներենի բաժնում, զուգահեռաբար 1973–1975 թթ. ավարտել Մոսկվայի «Ինտուրիստի» բարձրակարգ թարգմանչական դասընթացները։ 1972–1976 թթ. աշխատել է որպես գերմաներենի ուղեկցորդ-թարգմանիչ «Ինտուրիստ»-ում։

«Ծերության մասին լավագույն երգերը գրվում են երիտասարդության տարիներին։»

1972–2004 թթ. եղել է «Էվրիկա» վոկալ-գործիքային անսամբլի հիմնադիրը, գեղարվեստական ղեկավարը, կիթառահարն ու վոկալիստը. 1979 թվանից անսամբլը Հայաստանի հանրապետության ժողովրդական կոլեկտիվ էր։ Հանրային ռադիոյի «Երաժշտական եռանկյունի» հաղորդման մեջ (2022) նա ներկայացվել է որպես խորհրդային շրջանում հանրահայտ «Էվրիկա» խմբի հիմնադիր և Եղեգնաձորի հեղինակային երգի փառատոնի հիմնադիր, որն իրեն համարում է «հին ռոքեր». ուսանողական տարիները համընկել են Երևանի ռոք զարթոնքի հետ, երկար տարիներ ապրել է Մոսկվայում, որտեղ Վլադիմիր Վիսոցկու հարևանն էր, «Էվրիկա»-ի «ոսկե շրջանը» սկսվել է հայրենիք վերադառնալուց հետո՝ հյուրախաղերով ԽՍՀՄ-ում և Արևմուտքում։

Զբաղվել է նաև հասարակական-մշակութային աշխատանքով. 1976–1994 թթ. ղեկավարել է Եղեգնաձորի մշակույթի տան ժողովրդական ստեղծագործության կաբինետը, 1996–2005 թթ.՝ Վայոց ձորի մարզպետարանի զանգվածային միջոցառումների գլխավոր կազմակերպիչ և մարզային մշակույթի կենտրոնի տնօրեն, 1995–2002 թթ. եղել է մարզային «Արպա» հեռուստաընկերության հիմնադիր-տնօրենն ու գլխավոր խմբագիրը։

«Հեղինակային երգի հավաքածու 3»-ում (bardclub.am) ընդգրկված են նրա «Անվանենք իրերը իրենց անուններով», «Գիշերային ավտոբուս», «DEPRESSION», «Երգ երգի մասին», «Համեցեք «Բարդերի ակումբ»», «Ճամփորդական», «Մի՛ կոտրեք», «Ուշացած հանդիպում» երգերը։