Կենսագրություն. Հովակիմ Սաղաթելյան

1965 թ. — ծնվել է կիրակի օրը, չինական տարեցույցով ՕՁ-ի տարում, Քանաքեռում։ Ազգանունը ձեռք է բերել իր պապի հոր / բնիկ քանաքեռցի, Դալաք Վարդանոնց տոհմից/ Սուրբ Աստվածածնի քահանա Տեր Սաղաթելից։

1972 թ. – քաղաք Աբովյանի ռուսական թիվ 4 դպրոցում երգել է իր առաջին երգը սովետական բանակի տանկիստների մասին։

1979 թ. — դպրոցում ստեղծել է ազգայնական գաղտնի կազմակերպություն «Ծովից ծով» Հայաստանը ազատագրելու նպատակով։ Կազմակերպության տապալվելուց հետո /դավաճանի պատճառով/, սկսել է գրել բանաստեղծություններ և գերազանց սովորել։

1986 թ. – ստանալով ճառագայթման ոչ մահացու չափաբաժին, վերադարձել է սովետական բանակի տանկային զորամասից, որը գտնվում էր Չերնոբիլ քաղաքի մերձակայքում։ Գրել է իր 2 առաջին հեղինակային երգերը, մեկ՝ սիրո, մյուսը՝ միասեռության վտանգի մասին։

1993 թ. – ծնվել է իր առաջնեկը՝ Մարիամը, հետո Լուսինեն, իսկ մինչ այդ ավարտելով Եր.ՊԻ – ը որպես շինարար-ճարտարագետ, զբաղվել է հարբեցողությամբ, ծոմապահությամբ, քաղաքականությամբ, միստիկայով, այգեգործությամբ, բիզնեսով, ճարտարապետությամբ։ Գիտակցաբար մկրտվել է հայ առաքելական եկեղեցում։ Պսակադրվել է Աննայի հետ։

2000 թ. – մեկնել է ԱՄՆ աշխարհ տեսնելու և փրկելու նպատակով։

2007 թ. — փոխելով 5 մասնագիտություն, աշխատելով 13 տարբեր հաստատություններում, շփվելով մոլորակի շատ ու շատ ազգերի ներկայացուցիչների հետ, սեռն ու ազգությունը չփոխելով, մի արաբ-քրիստոնյա-ասորու խորհուրդով վերադարձել է Հայաստան, բերելով հետը 13 նոր գրված հեղինակային երգ։ Աշխարհի փրկության գործընթացը հետաձգել է որոշ ժամանակով։

2014 թ. – ծրագրավորում է ավարտել բոլոր տեսական բնույթի աշխատանքները. հաշվապահությունը, խաղեր հորինելը, վեպեր և բանաստեղծություններ գրելը, երգելը և անցնելու է բուն այգեգործությամբ զբաղվելուն։

2021 թ. – հետևելով Սվեդենբորգի օրինակին, դառնալու է պայծառատես…, եթե մինչ այդ աշխարհը փրկված լինի կործանումից։

Հետո — ճակատագիրն անհայտ է կամ դեռ որոշված չէ։

Լսել Հովակիմ Սաղաթելյանի երգերից