Վահան Անդրեասյան

Վահան Հրանտի Անդրեասյանը հայ բանաստեղծ, երգահան և հեղինակային երգի կատարող է, Հայաստանի գրողների միության անդամ (2003 թ.-ից), հայտնի նաև որպես տեր Թովմա քահանա։

Ծնվել է 1956 թ. սեպտեմբերի 27-ին Երևանում։ Ավարտել է Խաչատուր Աբովյանի անվան մանկավարժական ինստիտուտի կուլտուրայի ֆակուլտետի ռեժիսորական կուրսը, ուսումնասիրել տաղաչափություն, երաժշտական հարմոնիա, կոմպոզիցիա։ Աշխատել է որպես ռեժիսոր թատրոններում (Հենրիկ Մալյանի անվան, Մոսկվայի «Առլեկին», «Փոս» փորձարարական թատրոն) և ազգային հեռուստատեսությունում։

Հեղինակ է բազմաթիվ երգերի, գործիքային ստեղծագործությունների, թատերական երաժշտության և հեռուստաֆիլմերի երաժշտության, տեքստեր է գրել մի շարք երգահանների համար։ 2002 թ. արժանացել է «Սայաթ-Նովա» մրցանակի՝ «Բարին կհաղթի» երգի երաժշտության և տեքստի համար։ Ձայնասկավառակներ՝ «Սիրո վարդը» (1998), «Բարին կհաղթի» (2007), «Առանց հոգու ու՞ր ես գնում» (2017), «Սյուիտ լարային կվինտետի համար» (2018)։ Բարդ ակումբի «Հեղինակային երգի հավաքածու 3» ժողովածուում ներկայացված են նրա «Իմ այսօրվա դեմք» և «Ձյունը» երգերը։

2004 թ. ձեռնադրվել է սարկավագ, ապա քահանա՝ ստանալով տեր Թովմա հոգևոր անունը. ծառայել է Արարատյան թեմում (2004–2007), Ադիգեայում (2007–2010), 2010 թ.-ից՝ Երևանում։

Բանաստեղծություններ է գրել դեռ վաղ տարիքից, հեղինակ է 7 գրքի, թարգմանվել է ֆրանսերեն, ռուսերեն, գերմաներեն, տպագրվել Փարիզում և Բեռլինում։ Գրքերից են՝ «Բնության տաճարում», «Սիլֆի նուրբ երազանքները» (2023), «Անձևություն» (2019), «Մայկոպյան օրագիր» (2018), «Մորու բացատ» որբանոցը (2015), «Թիթեռների աշխարհում։ Դատաստան» (2013), «Գիտակցության ստերեոտիպեր» (2011), «Ասպետական օրագիր» (2003), «Օրհնյալ լինես, տառապանք» (1996)։ Գրական մրցանակներ՝ «Ասուպ» (1992), «Արծաթե բանալի» (1997), Սարգիս Գոգորյանի անվան (2019), «Ներսես Մեծ» (2024, պոեզիա)։