Էվա Պավելի Ոսկանյան (ծնվ. 1991 թ. հոկտեմբերի 28-ին, Երևան) հայ դաշնակահարուհի, կիթառահարուհի, երգչուհի և հեղինակային երգերի հեղինակ է, որ հանդես է գալիս նաև ռոք ժանրում։ Գրող և հոգեբան Էլդա Գրինի թոռն է, մայրը՝ դաշնակահարուհի Մարինե Աբրահամյանը։ Երգել սկսել է չորս տարեկանից, ստեղծագործել՝ տասներկու տարեկանից։ 1998 թ. ընդունվել է Երևանի Չայկովսկու անվան երաժշտական դպրոց, 2013 թ. ավարտել Կոմիտասի անվան պետական կոնսերվատորիայի դաշնամուրի բաժինը, նույն թվականին էլ ստացել իրավաբանական հոգեբանության մագիստրոսի աստիճան Ուրարտու համալսարանում։
«... Ես չեմ ուզում զարթնել Ու զգալ, որ դու չկաս...»
2007 թ. կազմավորել է «E.V.A.» ռոք խումբը և հանդես եկել համերգներով ու փառատոներով Հայաստանում, Վրաստանում, Չեխիայում և Գերմանիայում։ 2009 թ.ից Երևանի պետական տիկնիկային թատրոնի կոմպոզիտորն է, իսկ 2014 թ.ից՝ նույն թատրոնի դերասանուհի։ Ձայնագրել է ավելի քան տասնհինգ երգ, նկարահանել երեք տեսահոլովակ, գրել երաժշտություն կինոնկարների համար։ 2011 թ. Գերմանիայում Կոմիտասի անվան մրցույթ-փառատոնում արժանացել է «Կոմիտասի լավագույն մեկնաբան» մրցանակին, 2013 թ. նույն մրցույթում միաժամանակ մասնակցելով դաշնամուրային և վոկալ բաժիններին՝ ստացել է դաշնամուրային մրցույթի 3-րդ մրցանակը և հանդիսատեսի համակրանքի մրցանակը. «Վան» երաժշտական և «Phoenix» մրցանակաբաշխությունների դափնեկիր է։
2015 թ. «Հուսո առագաստ» հեղինակային երգի համահայկական փառատոնում իր հեղինակային երգով ընդգրկվել է լավագույն տասնյակում։ Ամուսնացած է երգահան և երգիչ Լևոն Հախվերդյանի հետ։ Բարդերի ակումբի «Հեղինակային երգի հավաքածու 3» ժողովածուում (bardclub.am, 2016) ներկայացված է նրա «Չեմ ուզում» երգը՝ խոսքերով, ակորդներով և ձայնագրությամբ։
