28.08.2015

«Եթե բարենպաստ քամի փչի, մեր նավարկությունը դեռ երկար կտևի».
«Հուսո առագաստ»-ը բացահայտեց 10 հեղինակ կատարողների

Հեղինակային երգի կատարողների «Բարդ» ակումբի ընտանիքը հարստացավ ևս 10 անդամով: «Նորեկները» «Հուսոառագաստ» հեղինակային երգի համահայկական փառատոնի 10 լավագույն մասնակիցներն են:

Հայաստանի կոմպոզիտորների միության «Երգի փառատոն-2015» մեգանախագծի շրջանակներում անցկացված փառատոնի առաջին փուլը կայացավ Սևանում` հուլիսի 31-ին, 2-րդը` օգոստոսի 26-28-ը Դիլիջանի Էդվարդ Միրզոյանի անվան կոմպոզիտորների ստեղծագործական տանը: Ժյուրիի կողմից ընտրված լավագույն 10 մասնակիցները օգոստոսի 27-ին «Բարդ» ակումբի 15 երաժիշտների հետ մասնակցեցին կոմպոզիտորների տան Բեթհովենի անվան համերգասրահում կազմակերպված գալա-համերգին, որին ներկա էին նաև ՀՀ մշակույթի նախարար Հասմիկ Պողոսյանը, Դիլիջանի քաղաքապետ Արմեն Սանթրսյանը, ՀԿՄ նախագահ Արամ Սաթյանը, տեղացիներ, ինչպես նաև հատուկ փառատոնին մասնակցելու համար Դիլիջան ժամանած այլ հյուրեր:

«Հուսոառագաստ» փառատոնի տնօրեն, հեղինակային երգի կատարող Վախթանգ Հարությունյանը մեր զրույցում նշեց, որ հայտնություն ունեն, արդեն մշակվող և տեղում զարգացող դուետներ, համագործակցության լայն շրջանակ է ձևավորվում` մարզեր, Արցախ, Երևան. «Ես ուրախ եմ, որ մեր փառատոնի 2 փուլերն էլ արեցինք Երևանից դուրս:

Իհարկե չի բացառվում, որ հետագայում Երևանում էլ ամփոփիչ համերգ կանենք, որին լավագույն տասնյակը կմասնակցի: Մենք համագործակցում էինք Հայատանի կոմպոզիտորների միության հետ և բնական էր, որ Դիլիջանի կոմպոզիտորների միության տանը տեղի ունեցավ փառատոնի 2-րդ փուլը: Բացի դրանից` սա մշակութային կյանքի ապակենտրոնացման լավագույն օրիանկներից մեկն է. մարզերում դրա կարիքն ու պակասը շատ է զգացվում»,- շեշտեց նա` հույս հայտնելով, որ մի օր պետական այրերն էլ կընդունեն, որ հեղինակային երգը շատ կարևոր դերակատարություն ունի որպես լեզվի կրող ժանր. «Հուսամ, որ հետագայում նմանատիպ փառատոները, համերգները ոչ միայն մեր ջանքերի շնորհիվ կկայանան, այլև կգտնվեն մարդիկ, ովքեր ինչ-որ չափով կսատարեն մեզ»:

Վ. Հարությունյանը չի ուզում շատ առաջ գնալ ու կանխատեսումներ անել` ամենամյա՞ կդառնա փառատոնը, թե՞ ոչ, բայց, իհարկե, ցանկությունը մեծ է. «Իհարկե շատ կուզենայիք, որ համագործակցությունն ընդլայնվեր, աջակիցներ ունենայինք, մեր հոգսը թեթևանար, քանի որ ի վերջո սա իրականություն դարձավ Բարդերի ակումբի և ՀԿՄ սուղ միջոցների շնորհիվ»,- ընդգծեց նա` հավելելով, որ ամեն դեպքում եթե իրենք` նավարկողները, լինեն հաստատակամ և փչի քամին, որը բոլորի հավատն է, նավարկությունը դեռև երկար կտևի:

Ամեն տասնամյակը մեկ 5-6 հոգին այս ժանրի համար, Վ. Հարությունյանի խոսքով, բավականին լավ ցուցանիշ է. շատերն են մեկ-երկու երգ գրում, բայց դա դեռևս չի նշանակում, որ նրանք այդ ժանրի կրողն են. «Սա ապրելակերպ է, տեսակ, առանց որի չես կարող լինել: Մենք կիթառի միջոցով փողանցում ենք մեր հույզերն ու պատմում ենք մեր մասին»,- հավելեց նա:

Գալա-համերգի ավարտին Վ. Հարությունյանը փառատոնի կազմակերպիչների անունից Դիլիջանի երաժշտական դպրոցին կիթառ նվիրեց` հույս հայտնելով, որ դա կնպաստի դպրոցում կիթառի դասարանի ձևավորմանը: Մշակույթի նախարարն էլ իր հերթին խոստացավ, որ կաջակցի դպրոցին այդ հարցում:

«Հուսա առագաստ» փառատոնին մասնակցելու հայտ էին ներկացրել երկու տասնյակից ավելի հեղինակ-կատարողներ Հայաստանի տարբեր մարզերից և Արցախից: Պարտադիր պայմանի համաձայն՝ մասնակիցները հանդես են եկել հայալեզու երգերի կատարմամբ: Ժյուրիի կողմից ընտրված 10 լավագույն կատարողները կձայնագրվեն, սկավառակ կթողարկվի, ինչպես նաև այսուհետ նրանք կմասնակցեն Բարդերի համերգներին: «Երգի փառատոն-2015»-ը Հայաստանի կոմպոզիտորների միության մեգանախագիծն է, որը համախմբում է երաժշտական տարբեր ժանրերը: Այս փառատոնի ընթացքում բացի հեղինակային երգի ներկայացումից, տեղի կունենան նաև համերգներ էստրադային և ժողովրդական ժանրերում:

Անի Ռափյան

{gallery}28.08.2015/1{/gallery}