«Հուսո առագաստ» փառատոն` բացահայտվելու հնարավորություն երիտասարդ հեղինակ-կատարողների համար

25.07.2015
Nyut.am-ը գրում է.

Սևանում և Դիլիջանում երկու փուլով առաջին անգամ կանցկացվի «Հուսո առագաստ» հեղինակային երգի փառատոնը, որը բեմահարթակ կտրամադրի դեռևս անհայտ հեղինակային երգի կատարողներին:

«Բավականին երկար ժամանակ է` ավելի քան յոթ տարի, որ մենք փառատոնային հանդիպում չենք ունեցել: Հուսով եմ, որ այս փառատոնի շնորհիվ մեր բանակը կհամալրենք մի քանի երիտասարդ կատարողներով»,- այսօր լրագրողների հետ հանդիպմանը նշեց «Հուսո առագաստ» փառատոնի տնօրեն, հեղինակային երգի կատարող Վախթանգ Հարությունյանը` տեղեկացնելով, որ փառատոնն անցկացվելու է Հայաստանի կոմպոզիտորների միության հետ համատեղ` «Երգի փառատոն 2015» մեգանախագծի շրջանակում:

Փառատոնի առաջին փուլը տեղի է ունենալու Սևանում` Շորժայի «Wishup» լողափում, հուլիսի 31-ից օգոստոսի 2-ը: Այսօրվանից բոլոր հայտատուները կարող են իրենց հայտերը ներկայացնել Հայաստանի կոմպոզիտորների միություն:

Կազմակերպիչները խոստանում են ապահովել տոնական տրամադրություն` խարույկի շուրջ համերգ, վրանային երկու գիշեր և այլն: Երկրորդ և հիմնական փուլը կանցկացվի օգոստոսի 26-28-ը` Դիլիջանի Կոմպոզիտորների միության հանգստյան տանը:

Փառատոնն անցկացվելու է Երևանից դուրս, քանի որ շատ հաճախ, կազմակերպիչների խոսքով, մշակութային իրադարձությունները կենտրոնանում են միայն Երևանում. այս փառատոնը կինտեգրի նաև Երևանից դուրս ապրողներին:

«Վերջին գալա համերգի հասույթն ուղղվելու է Դիլիջանում երաժշտական դպրոցի կիթառային դասարանի ձևավորմանը: Փորձելու ենք մեկ տարի հովանավորել, որ այդ դասարանն աշխատի»,- նշեց Վ. Հարությունյանը և, անդրադառնալով փառատոնի խորագրին, ասաց, որ «Հուսո առագաստ»-ի թեման բավականին հարազատ է բոլորին. «Այս երգը` որպես հիմն, հնչում է մեր բոլոր համերգներին. շատ անկեղծ երգ է: Թե´ հույսի, թե´ առագաստի մեջ մեծ խորհուրդ կա, և փորձելու ենք երգի հիմնական խորհուրդը նաև փառատոնի ձևով ներկայացնել»:

Փառատոնի գեղարվեստական ղեկավար Էդուարդ Զորիկյանը նշեց, որ տարիքային սահմանափակում չկա, չկա նաև կոնկրետ թեմա, որի շուրջ պետք է ներկայացվեն երգերը, պարզապես դրանք պետք է լինեն հեղինակային երգի ժանրի մեջ. «Սա ավելի շատ ոչ թե մրցույթ է, այլ հնարավորություն այն երիտասարդների համար, ովքեր ներկայանալու հանարվորոթյուն չունեն: Մենք նրանց հարթակ ենք տրամադրելու, ապահովելու ենք նրանց շփումն արդեն ճանաչված հեղիանկային կատարողների, ինչպես նաև հեղինակային երգի երկրպագուների հետ»,- նշեց նա:

Փառատոնին մասնակից լավագույն տաս հեղինակային երգի կատարողները կստանան Կոմպոզիտորների միությունում ձայնագրվելու հնարավորություն, այնուհետև Բարդերի ակումբը կբազմացնի սկավառակը հարյուր օրինակով և կտարածվի: