Կենսագրություն. Ֆորշ

Ֆորշը (իսկական անունը՝ Վահան Գեորգիի Գևորգյան) հայ երգիչ, երգահան և դերասան է, Հայաստանի վաստակավոր արտիստ (2011)։ Ծնվել է 1967 թ. մայիսի 25-ին Երևանում։ Երգեր գրում է 1983 թվականից։

«Բարև՛, իմ սե՛ր:»

Ավարտել է Երևանի Չայկովսկու անվան երաժշտական դպրոցի ջութակի դասարանը (1985), ապա 1985–1992 թթ. սովորել Երևանի Կոմիտասի անվան պետական կոնսերվատորիայի ջութակի բաժնում։ 1990–1996 թթ. եղել է «Մետրո» թատրոնի դերասան և կոմպոզիտոր. գրել է երաժշտություն թատերական ներկայացումների համար, այդ թվում՝ Նիկոլայ Ցատուրյանի «Հեթում արքա» և «Ապերախտ տղամարդիկ», Վիգեն Ստեփանյանի «Շունն ու կատուն» բեմադրություններին. նկարահանվել է նաև կինոյում։ Ավելի քան 50 երգի հեղինակ է, նկարահանել է 20-ից ավելի տեսահոլովակ։

1994 թ. հիմնել է «Ռե Մինոր» խումբը, որի հետ համերգներով հանդես է եկել տարբեր երկրներում. նույն թվականին լույս է տեսել նրա «Բարև, իմ սեր» ալբոմը։ 2007 և 2008 թթ. մասնակցել է Հայաստանի հանրային հեռուստաընկերության «Երկու աստղ» երաժշտական նախագծին։ 2008 թ. հիմնել է «Ֆորշ և ընկերներ» կազմակերպությունը, որը Սևանա լճի ափին անցկացրել է «Երաժիշտներ հանուն խաղաղության» միջազգային փառատոնը։

Ալբոմներն են՝ «Բարև, իմ սեր» (1994), «Գիշեր» (1997), «Խենթ աղջիկ» (2002), «Այսպես էլ ապրում ենք» (2004), «The Best», «Երևանը մենք ենք» (2014)։

Բարդերի ակումբի (bardclub.am) «Հեղինակային երգի հավաքածու 3» նախագծում ներկայացված են նրա «Բարև՛, իմ սե՛ր», «Դու դեռ չգիտես» և «Կեսգիշեր» երգերը։ Նրա կազմակերպմամբ (Forsh & Re Minor) Երևանում կայացել է նաև «Քրիստ Մանարյան. երգեր և պոեզիա» համերգը։

Պարգևներ՝ Հայաստանի վաստակավոր արտիստ (2011), Երևանի քաղաքապետի ոսկե մեդալ (2016)։