19.12.10 Bravo.am

Դեկտեմբերի 17-ին The Club-ում կրկին հեղինակային երգի երեկո էր, իսկ հեղինակը` Վախթանգ Հարությունյանը: Երկար ժամանակ խուսափելով անհատական երեկոյից`Վախթանգը սահմանափակվում էր ամեն ուրբաթ 4-5 երգ կատարելով, քանի որ, ինչպես ինքն է նշում, առանձնապես ցանկություն չուներ վերհիշել 20 տարի առաջվա երգերն ու վերապրել դրանք: Ամեն դեպքում, հեղինակը մոտ 100 երգից ընտրել էր 25-30 ստեղծագործություն եւ դրանք ներկայացրեց հեղինակային երգը գնահատողների դատին:

Կայացավ Վախթանգ Հարությունյանի հեղինակային երգերի երեկոն

Bravo.am-ի հետ զրույցում Վախթանգն ասաց, որ ծրագիրը պայմանական բաժանել է 3 փուլի. «Առաջինը մինչ 1998-ի երգերն են, ապա մինչ 2005-ը, իսկ հաջորդը` 2005-ից մինչ օրս գրված երգերը: Առաջինը կրում է «Ցնորք» խորագիրը. դա այն զգայական ժամանակահատվածն է, երբ սեւ ու սպիտակի մեջ ապրելով` ծայրահեղացնում էի ամեն տեսակի գույները եւ, բացառելավ այդ գույները, ապրում երկու բեւեռների մեջ, երկրորդը դա զգայական տիրույթն է, որտեղ գույներ տեսնելու հավակնությամբ ենք ապրել, իսկ երրորդ բաժինը բանականությանն է, որտեղ սրտի եւ մտքի ներդաշնակության տիրույթն է»:

Ներկաները կատարումները լսելուց բացի հնարավորություն ունեին նաեւ իրենց հարցերն ուղղել Վախթանգին

Ծրագրի ողջ ընթացքում ակումբային փոքրիկ բեմում Վախթանգն ու իր կիթառն էին. հեղինակը երգից առաջ խոսում էր դրա փիլիսոփայությունից, երբեմն երգերից բացի նաեւ բանաստեղծություններ ներկայացնում. «Կան բանաստեղծություններ, որոնք երգ չեն դարձել, ես գտնում եմ, որ դրանք կարող են նաեւ այդպիսին լինել. հեղինակային երգն առաջին հերթին բանաստեղծական ժանր է»: Ներկաները կատարումները լսելուց բացի հնարավորություն ունեին նաեւ իրենց հարցերն ուղղել Վախթանգին, ինչն անում էին գրավոր հարցման օրինակով:). «Սեղանին թղթեր կան, կարող եք այնտեղ գրել Ձեր հարցերն ու ուղարկել այստեղ»,- ներկաներին ասաց հեղինակը, իսկ Բարդերի ակումբի մեկ այլ հեղինակ-կատարող Արմինե Հայրապետյանը ընդունում էր «գրավոր հարցերը» եւ ուղղում Վախթանգին: Երեկոյի ընթացքում Վախթանգը երբեմն երգերից բացի նաեւ բանաստեղծություններ էր ներկայացնում

Մեզ հետ զրույցում հեղինակ-կատարողը խոսեց նաեւ իր հանդիսատեսի մասին. «Այստեղ պատահական մարդիկ չկան, այն մարդիկ են, ովքեր սիրում են խոսքը, ովքեր գնահատում են այն, ինչ մենք անում ենք, օտարներով չենք շրջապատվում. մի տեսակի, մի բանաձեւով ապրող մարդիկ են, բոլորը ամբողջությամբ մի հոգսով են ապրում, թոթափում այդ հոգսերը, փորձում են կիսել իրենց մտորումները»: Ամփոփելով 2010-ի իրենց գործունեությունը` Վախթանգն ասաց, որ վատ չէր. «Եթե հաշվի առնենք այն, որ հեղինակային երգի ասպարեզում տեղի ունեցան մի շարք իրադարձություններ, այդ թվում նաեւ Բարդերի ակումբի մեկ տարվա գործունեությունը, բավական հաջող էր»,- Վախթանգն ասաց, որ այդ հաջողությունների հետեւանքով արդեն 2011-ին լույս կտեսնեն նոր ալբոմներ, այդ թվում իր չորորդ սոլո ալբոմը:

Տեքստը` Սիրանուշ Եղիազարյանի /Bravo.am/
Լուսանկարները` Կարեն Հովհաննիսյանի /Bravo.am/